ERANSKINA: KONTRATAZIO-BALDINTZA OROKORRAK

1. APLIKAZIO-EREMUA

1.1 Kontratazio-baldintza orokorrak («baldintza orokorrak») Kids&Us zentroa ustiatzen duen sozietatearen («hornitzailea») eta bezeroaren artean ingelesa irakasteko zerbitzuak emateari aplikatzekoak dira, eta une oro hornitzailearen eta bezeroaren artean (biak batera, «alderdiak») indarrean dauden baldintza partikularretan identifikatuta egongo dira.

1.2 Baldintza orokor hauetan aurreikusitako ondorioetarako:

1.  «Baldintza partikularrak» osatzen dituzte matrikula-orriak (baldintza hori 5 definitzen den bezala), birmatrikulazioek (baldintza hori 6. atalean definitzen den bezala) eta, hala badagokio, baldintza orokor hauetan xedatutakoaren arabera alderdiek egiten dituzten bestelako dokumentu eta akordio komertzialek ere.
2. «Bezeroa» da hornitzailearen zerbitzuak kontratatzen dituen pertsona. Zerbitzu horiek bere izenean edo bere tutoretzapeko edo guraso-ahalpeko adingabe baten izenean eta hura ordezkatuz kontratatzen ditu. Bezeroak ezin ditu zerbitzu horiek hirugarrenen esku utzi, eta ezin ditu bezeroa edo zentroan ikasle gisa inskribatuta dagoen tutoretzapeko edo guraso-ahalpeko adingabea ez den beste inork erabili.
3. «Zerbitzuak» dira Kids&Us-en sistemaren arabera ingelesa irakasteko ematen diren zerbitzuak, bezero batek unean-unean kontratatzen dituenak baldintza partikularren araberako irismenarekin, eta betiere hornitzaileak eman behar dituenak, baldintza partikular horien eta baldintza orokor hauen arabera.
4. «Kontratua» baldintza partikularrek eta baldintza orokorrek osatzen dute.
5. «Mousy» dira Kids&Us metodologiaren lehen ikastaroko urtebetetik gorako ikasleak.
6. «Linda» dira Kids&Us metodologiaren lehen ikastaroko bi urtetik gorako ikasleak.

1.3 Baldintza orokorrak eta baldintza partikularrak gaztelaniaz daude idatzita. Baldintza orokorren eta baldintza partikularren artean kontraesanik badago, baldintza partikularretan aurreikusitakoa gailenduko da.

1.4 Baldintza orokor hauek onartzeak, dela baldintza orokorrak sinatuz, dela matrikula-orria edo birmatrikulazioa sinatuz, honako hau esan nahi du:

7. Bezeroak hemen azaldutakoa irakurri, ulertu eta onartzen duela, eta, izan ditzakeen zalantzak argitzeko, hornitzaileari behar diren galderak egiteko aukera izan duela.
8. Bezeroa kontratatzeko gaitasuna duen pertsona bat dela.
9. Bezeroak kontratuan agertzen diren betebeharrak bere gain hartzen dituela.

1.5 Baldintza orokorrak aldatu ahal izango dira, adibidez, lege-, arau-, segurtasun- edo merkataritza-arrazoiengatik, betiere proposatutako aldaketak bezeroari igorri ondoren hark bere borondatez eta inolako eragozpenik gabe onartzen baditu. Baimen hori onartu dela ulertuko da, baldin eta hogeita hamar (30) egun natural igarotzen badira bezeroari entregatzen zaizkionetik (hartu-agiriarekin) edo bezeroari hornitzailearen webgunean (https://www.kidsandus.es/eu) daudela idatziz jakinarazten zaionetik, hark ez badu idatziz adierazten aldaketa horiek sartzearen aurka dagoela.

2. ZERBITZUAK

2.1 Kontratua onartu aurretik, bezeroari honako alderdi hauen berri eman zaio mezu elektroniko baten bidez edo paperezko euskarrian entregatuz:

i. Eskainitako ikastaroen katalogo osoa, ikastaroen funtsezko ezaugarriak eta helburuak, iraupena eta orduak, eta Kids&Us metodoan oinarritutako irakaskuntza-sistemaren ezaugarri nagusiak.

ii. Hornitzailearen identifikazio-datuak (bere kontura jarduten duela berariaz adierazita), bai eta zerbitzuak emateko erabiliko den zentroarenak ere.

iii. Bezeroari interesatzen zaion ikastaroaren prezioa, zerga eta tasa guztiak barne, bai eta materialen kostua ere (baldintza hori 2.10 atalean definitzen den bezala) (guztia batera, «prezioa»), bezeroak nahitaez hartu beharko duena bere gain eta ikastaroa egiteko beharrezkoa dena, Kids&Us irakaskuntza-metodoari datxekiolako, bai eta ordaintzeko baldintzak eta modua ere.

iv. Hornitzaileak, antolaketarako kontuak direla eta, ikasturte bakoitza hasi aurretik zenbat birmatrikulazio egongo diren jakin behar duela, eta, beraz, urtero birmatrikulazioen prozedura egiten dela modu telematikoan.

v. Bezeroak atzera egiteko eskubidea duela, 3. ataletik ondorioztatzen den moduan.

vi. Baldintza orokor hauen edukia, bezeroari horiei buruzko galderak egiteko aukera eskainita.

2.2 Zerbitzuak matrikula-orrian edo birmatrikulazio-formularioan zehaztutako zentroan emango dira.

2.3 Eskolen ordutegiak eta iraupena, ikastaroaren arabera:

1. Babies (Mousy-Linda): Babies ikastaroetako eskolen iraupena 45 minutukoa izango da, astean behin. Eskolan ikasle bakarra izanez gero, eskolak 30 minutu iraungo ditu. Izan ere, arreta osoa ikasle horretan jarriko denez, haren adinaren araberako kontzentrazio-gaitasunera egokitu behar da denbora. Kanpoko zentroetako Babies ikastaroetako eskolen kasuan, iraupena 30 minutukoa izango da
2. Kids (Sametik Pam&Paulera): Sametik Pam&Paulera bitarteko ikastaroetako eskolen iraupena 60 minutukoa izango da, astean behin
3. Ben&Brenda: Ben&Brenda ikastaroetako eskolen iraupena 90 minutukoa izango da, astean behin.
4. Tweens 1 eta 2: Animal Planet ikastaroetako eskolen iraupena 60 minutukoa izango da, astean bitan.
5. Tweens 3tik Teens 4ra: Fairy Tales, Mysteries eta The Future ikastaroetako eskolen iraupena 90 minutukoa izango da, astean bitan.
6. Teens 5etik Teens 6ra: Subscription ikastaroetako eskolen iraupena aukeratutako modalitatearen araberakoa izango da: 90 minutu, astean bitan; edo, 90 minutu, astean behin.
7. One-to-one (ikasle bakarra) eskolen kasuan, eskolen iraupena desberdina izan daiteke, zentroak horretarako ezarritako programaren arabera.

2.4 Kids&Us ikaskuntza-metodologiari jarraitzen ez dioten eskolen kasuan, ordutegia, eskolen iraupena, ikasleen kopurua, ikastaroaren hasiera- eta amaiera-data edo erabilitako materiala desberdinak izan daitezke zentroaren arabera.

2.5 Eskolen ordutegi zehatza baldintza partikularretan agertzen dena izango da eta, beraz, desberdina izan daiteke ikasturte bakoitzean, aukeratutako ikastaroaren eta une bakoitzean erabilgarri egon daitekeen ikastaro bakoitzari esleitutako ikasleen kopuruaren arabera.

2.6 Ikastaroa, oro har, urte natural bakoitzeko irailean hasiko da, eta hurrengo urteko ekainean amaituko da, data zehatzetan eta baldintza partikularrek zehaztutako eskola-egunen egutegiaren arabera.

2.7 Eskola-egutegian markatutako eskoletara bertaratu ezin izan diren ikasleek, arrazoia edozein izan dela ere, ezingo dituzte horiek berreskuratu.

2.8 Babies ikastaroan, gehienez ere bost (5) ikasle izango dira ikasgelako, eta zortzi (8) gainerako ikastaroetan. Kanpoko zentroetan ematen diren Babies eskolen kasuan, gehienez zortzi (8) ikasle egongo dira taldeko. Ikastaroa hasten denetik hilabete igaro ondoren ikasgela bakoitzean dagoen ikasle kopurua hiru (3) edo txikiagoa bada eta ez badago ikasle horiek har ditzakeen beste talderik, hornitzaileak taldea desegiteko eskubidea izango du, eta, kasu horretan, bezeroari epe horretan matrikula gisa ordaindu duen edozein kopuru itzuliko zaio, 2.11 atalean aipatzen diren materialen kostua barne.

2.9 Birmatrikula-aldian, hornitzaileak taldeen osaera aldatzeko eskubidea izango du, behin betikoa izan arte. Behin betikoa denean, postaz baieztatuko zaio bezeroari.

2.10 Mousy ikastaroko ikasleak adin nagusiko pertsona batez lagunduta egongo dira ikastaro osoan. Aldiz, Linda ikastaroko bost (5) ikasleak hasierako hilabeteetan soilik egongo dira adin nagusiko pertsona batek lagunduta. Kanpoko zentroetan ematen diren eskoletan, ikasleekin batera ez da heldurik egongo.

2.11 Irakasleek ikastaroak emateko titulazio akademiko edo kualifikazio profesional egokia dute. Zerbitzuak kontratatzeko baldintza orokorrak onartzen badira, eta, horrez gain, baldintza partikularrak onesten badira, ulertuko da bezeroak badakiela eta onartzen duela zerbitzu horiek Kids&Us-en irakaskuntza ez-arautuaren metodoan oinarritzen direla. Metodo horrekin, ikaslea zentrora bertaratuko da eta hezkuntza-material propioak («materialak») erabiliko ditu. Material horien kostua bezeroak hartuko du bere gain, material hori ikastaro bakoitzeko beharretara egokitzeari kalterik egin gabe.

Materialak desberdinak izango dira etapa bakoitzaren arabera, eta edukia formatu fisikoan eta digitalean jasoko dute. Horiek ikasleei Kids&Us zentroetako ikasgelan hasi eta hortik kanpo osatzen den esperientzia globala eskaintzeko sortu dira. Ikastaro bakoitzeko materialak zentroak jakinaraziko ditu ikasturte hasieran, «materialen katalogoaren» bidez.

2.12 Zerbitzuak irakaskuntza ez-araututzat hartzen dira, eta, hori dela eta, hornitzaileak eman ditzakeen diplomak edo ziurtagiriak ez dira ofizialak. Hornitzaileak nazioartean onartzen diren diplomak eskuratzeko azterketetarako prestatzen ditu ikasleak, hala nahi izanez gero. Diploma lortzeko eskubideen prezioa hornitzaileak eskainitako ikastaroen prezioan sartuko da, hornitzaileak berariaz hala adierazten badu.

3. UKO EGITEKO ESKUBIDEA

3.1. Bezeroak zerbitzuei uko egiteko eskubidea izango du baldintza partikularrak sinatzen direnetik hamalau (14) egun naturaleko epean, arrazoia adierazi behar izan gabe eta kostuak ordaindu behar izan gabe. Bezeroak uko egiteko eskubidea erabiltzen badu, hornitzaileak bezeroak ordaindutako zenbateko guztiak itzuli beharko dizkio, bezeroak hasierako transakziorako erabilitako ordainketa-bide bera erabiliz. Materialei dagozkien zenbatekoak material fisikoak itzuli ostean soilik itzuliko dira, eta erabili gabe badaude bakarrik onartuko dira.

3.2. Atal honetan arautzen den uko egiteko eskubidea edozein bitarteko idatziren bidez baliatu ahal izango da, eta bezeroak alde bakarretik egiten badu, hornitzaileak atzerapenik gabe jakinarazi beharko dio, euskarri iraunkor baten bidez, uko egitearen jasotze-agiria jaso duela.

4. PREZIOA

4.1. Bezeroak honako kontzeptu hauek ordainduko ditu zerbitzuengatik, eta horien zenbatekoa eta ordainketa-baldintzak baldintza partikularretan une bakoitzean (herrialdean indarrean dagoen legezko erabilerako monetan adierazita) jasotzen direnak izango dira:

1. Matrikula eta birmatrikula, dagokionaren arabera.
2. kastaroaren prezioa, dagokionaren arabera.
3. Materialak.
4. Zergak, indarrean dagoen legediaren arabera aplikagarriak direnak.

4.2. Baldintza partikularrek beste zerbait adierazi ezean:

5. Matrikularen zenbatekoa matrikula-orria edo, hala badagokio, birmatrikula sinatu ondoren ordainduko da.
6. Materialen zenbatekoa matrikula-orria edo, hala badagokio, birmatrikula sinatu ondoren ordainduko da, ikaslea ikastaroan benetan noiz hasten den kontuan hartu gabe.
7. Prezioa, baldintza partikularretatik aterako dena, oroharrekoa da, eta, beraz, ikastaroari lotutako ezaugarriak kontuan hartuta kalkulatuko da, eta alderdien artean itundutako aldizkako ordainketek ez dituzte aldi jakin horri dagozkion eskola-orduak ordainduko. Beraz, edozein arrazoi dela medio (jaieguna, gaixotasuna, ezinbesteko kasua edo beste edozein kausa), bezeroak ez badu jasotzen prezioaren aldizkako ordainketaren bati dagokion eskola-orduen kopurua, ez du ordu horiei dagokiena jasotzeko eskubiderik izango, ez eta eskola horiek berreskuratzeko eskubiderik ere.
8. Kasu bakoitzean aplikatu beharreko zergak indarreko araudian aurreikusitako moduan ordainduko dira.

4.3. Hornitzailea 2.8 eta 3. ataletan aurreikusitako kasuetan bakarrik egongo da matrikula eta materiala itzultzera behartuta. Aplikatzekoa den araudian xedatutakoari ezertan kalterik egin gabe, hornitzaileak ez du matrikularen edo materialaren zenbatekoa itzuli beharrik izango bestelako ezein kasutan. Bereziki, bezeroak ulertzen eta onartzen du ikastaroa uzteak, arrazoia edozein izanik ere, edo bezeroak hornitzailearekiko duen harremana amaitzeak zenbateko horiek galtzea dakarrela.

4.4. Bezeroak zerbitzuen kontraprestazioan sartzen den zenbatekoren baten ordainketa helbideratu badu eta ordainagiriren bat itzultzen bada, bezeroak bere gain hartuko ditu inguruabar horri lotutako kostu guztiak, hornitzailearentzako kaltegabetasun osoz.

4.5. Edozein deskontu, prezio-murrizketa eta/edo bestelako beherapen egiteko, alderdiek aldez aurretik eta idatziz adostu beharko dute.

4.6. Matrikula eta ikastaroak pertsonalak eta besterenezinak dira eta, beraz, matrikula-orrian identifikatutako ikaslea ez den beste inor ezingo da joan bezeroak kontratatutako ikastaroetara.

5. MATRIKULA-ORRIA

5.1. Hasiera batean, bezeroak kontratatuko ditu zerbitzuak, dagokion matrikula-orria («matrikula-orria») sinatuta. Orri hori idatziz formalizatuko da, posta elektronikoaren, posta arruntaren edo eskura emandako paperaren bidez. Matrikula-orri bakoitzean honako hauek jaso beharko dira, gutxienez:

1. Bezeroaren eta zerbitzuak kontratatzen dituen ikaslearen identifikazioa, bai eta bezeroaren eta ikaslearen arteko harremana eta, hala badagokio, harekiko duen guraso-ahala edo tutoretzaren egiaztapena.
2. Eskatutako zerbitzuak, intereseko ikastaroa adierazita eta haren xehetasunak eta ezaugarriak adierazita.
3. Zerbitzuen kontraprestazioa.
4. Berariaz aipatzea bezeroak baldintza orokorrak berrikusi dituela, hornitzaileak bezeroari kontsultak egiteko aukera eskaintzen diola, eta, horrez gain, bezeroak baldintza orokorrak berariaz onartzen dituela, hala badagokio, 1.4 atalean aipatzen den kontratu aurreko informazioa eskuratu duela.
5. Bezeroak hurrengo ikastaroetarako informazioa eta birmatrikulazio-formularioak posta elektronikoz, hornitzailearen webgunean horretarako sortu den gunean edo alderdien artean hitzartutako beste edozein bitartekoren bidez jasotzeko ematen duen baimena. Ikastaro horiek urrutitik kontratatu ahal izango dira, eta baldintza orokor hauek aplikatuko zaizkie.
6. «Alfa txartela» izeneko dokumentuan, bezeroak bere datu pertsonalak, ahotsa eta irudia tratatzeko ematen duen baimena, bai eta eremu horretan dituen eskubideak eta horiek erabiltzeko moduaren adierazpena ere, eta tratamendu horren arduradunen identifikazioa.

5.2. Matrikula-orria ez da loteslea izango alderdientzat, hornitzaileak onartzen duen arte eta bezeroari posta elektronikoz edo posta arruntez bidaltzen zaion arte, edo matrikula-orria («onarpena») bidaltzeko metodo berari jarraitzen zaion arte. Data horretatik aurrera, alderdien arteko harremana hasitzat joko da.

Hornitzaileak bezeroari onarpena bidaltzeari inolako kalterik egin gabe, hornitzailea behartuta dago matrikula-orriaren eta haren onarpenaren kopia digitalizatu bat zentroan gordetzera, egindako kontratazioaren froga gisa.

5.3. Hornitzaileak ez du matrikula-orririk onartzeko inolako betebeharrik, eta, beraz, horiek ukatzeko eskubidea du, eta horren ondorioz ez zaio inolako erantzukizunik sortuko hornitzaileari.

6. BIRMATRIKULAZIOAK

6.1. Urtero, ikasturtea amaitu baino lehen (martxotik maiatzera bitartean, gutxi gorabehera), hornitzaileak jakinarazpen bat igorriko dio bezeroari posta elektronikoz. Bertan, hurrengo ikasturteari buruzko informazioa emango da, 2.1 atalean jasotzen dena («birmatrikulazioaren jakinarazpena»). Horrez gain:

1.  Ikasturte berrirako birmatrikula («birmatrikula») egiteko aukera, zentrora bertaratuta ez ezik, urrutitik, bitarteko elektronikoen bidez, birmatrikulazio-formularioa betez («birmatrikulazio-formularioa»).
2. Honako hauek berariaz aipatzea:
   1. Birmatrikulazio-formularioa beteta itzultzeak esan nahi du, zentroak hura onartzen duenean, bezeroak ordaindu egin beharko duela ikasturte berriko kontraprestazioa, baldintza partikularretan adierazten den moduan, eta baldintza orokorrak onartuko direla.
   2. Hornitzaileak birmatrikulazio-formularioa onartu ondoren, birmatrikulazio-formularioaren baldintzek (baldintza partikulartzat hartuko dira) eta baldintza orokorrek arautuko dute alderdien arteko harremana, kontratatutako ikastaro berria amaitu arte.
   3. Hornitzaileak bere onarpena bidaliko dio bezeroari, euskarri iraunkor baten bidez artxibatzeko.
   4. 6.1 atalean aurreikusitakoarekin bat etorriz, eta hornitzaileak bezeroari birmatrikulazio-formularioaren onarpena bidaltzeari inolako kalterik egin gabe, hornitzailea behartuta dago bezeroaren birmatrikulazio-formularioaren eta hornitzailearen onarpenaren kopia digitalizatu bat zentroan gordetzera, egindako kontratazioaren froga gisa.

6.2. Birmatrikulazioari unean-unean indarrean dagoen bitarteko elektronikoen bidezko urrutiko kontratuen erregulazioa aplikatuko zaio.

7. ERREKLAMAZIOAK

7.1. Bezeroak zerbitzuekin lotutako edozein erreklamazio egin ahal izango du zentroan eskura dituen erreklamazio-orrien bidez.

7.2. Araudi nazional aplikagarrian xedatutakoaren arabera, jakinarazten da bezeroak, hala badagokio, zerbitzuak behar bezala ez emateari buruzko erreklamazio bat aurkeztu ahal izango duela, kontsumitzaileekin edo erakunde eskudun baliokidearekin auziak modu alternatiboan ebazteko plataforman, legez aurreikusitako kasuetan, eta hornitzailea ez dagoela bertan parte hartzera behartuta.

8. KALTEENGATIKO ERANTZUKIZUNA

8.1. Hornitzaileak bere gain hartzen du zerbitzuen gaineko erantzukizun osoa, eta bezeroaren aurrean erantzungo du, hornitzaileari edo haren profesional edo enplegatuei egotz dakizkiekeen arrazoiengatik, haietako edozeinen doloagatik edo erru larriagatik sortutako kalteengatik. Kasu horietatik kanpo, hornitzailearen erantzukizuna, zeina bezeroari benetan eragindako zuzeneko kalteengatik bakarrik izango den (eta beraz, lortu gabeko irabazia edo izen onari egindako kalteak kanpo daude), zerbitzuen kontraprestazioan bezeroarengandik jaso dituen zenbatekoetara mugatuko da.

8.2. Hornitzailea ez da, inola ere, bezeroak informazioa faltsutzearen, ezkutatzearen edo beste edozein jokabide izatearen ondorioz sortutako kalteen (osorik edo zati batean) erantzule izango, baldin eta kalte horiek dolozkoak edo zabarrak badira, ez badira fede onaren printzipioen arabera egin, edo bezeroaren arrazoizko kontroletik kanpo dauden arrazoiengatik gertatzen badira.

8.3. Hornitzaileak bezeroarekiko duen erantzukizuna, zerbitzuei dagokienez, bezeroak erreklamazioa idatziz bidaltzearen baldintzapean dago. Bertan, erreklamazioaren izaera eta erreklamatutako zenbatekoa behar bezala zehaztu beharko ditu, doloaren kasuan izan ezik, ezen legez ezarritako preskripzio-epea aplikatuko baitzaio.

8.4. Hornitzaileak bezeroarekiko bakarrik izango du erantzukizuna, halakorik bada. Hornitzaileak ez du izango hirugarrenei sor dakizkiekeen kalteen erantzukizunik.

9. MY WAY

9.1. Hornitzaileak ikaslearen eskura jartzen duen hezkuntza-aplikazioa da. My Way-k, ikasgelan egindako lana osatzeaz gainera, ikasteko ibilbide pertsonalizatuak eskaintzen ditu, ikasle bakoitzak ikastaroaren komunikazio-helburuak lortzen dituela ziurtatzeko.

9.2. Ikasleak My Way erabili ahal izateko eta, hortaz, zerbitzu horretaz disfrutatzeko, My Way-ren erabiltzailea izan behar du. Horretarako, bezeroak aplikazioaren baldintzak onartu behar ditu; matrikula-orrian, «My Way-ren baldintzak» gisa jaso dira.

10. BEZEROAK ZERBITZU-HARREMANA AMAITZEA. IKASLEAREN BAJA.

10.1. Bezeroak edozein momentutan amaitu ahal izango du hornitzailearekin duen harremana eta, beraz, ikasleak edozein momentutan hartu ahal izango du baja matrikulatuta dagoen ikastaroan. Horretarako, zentroko zuzendariari idatzizko komunikazio bat helarazi beharko dio.

10.2. Matrikulagatik, birmatrikulazioagatik eta materialagatik ordaindutako zenbatekoak ez dira itzuliko, salbu eta bezeroak uko egiten duenean edo hornitzailearen ez-betetze baten ondorioz bezeroak kontratua amaitzen duenean. Ondorioz, bezero batek kontratua aldez aurretik amaitzeak ez dio zenbateko horiek itzultzea eskatzeko eskubiderik emango, ez eta ikastaroaren prezio gisa ordaindutako zenbatekoa ere.

Beraz, hura amaitzearen (edo ikaslearen bajaren) ondore-data ez badator bat baldintza partikularretan ezarritako ordainketa-aldiaren azken eskola-egunarekin, hornitzaileak beretzat hartuko ditu bezeroak jada ordaindu dituen zenbateko guztiak, eta bezeroak ezin izango du inolako kopururik itzultzea erreklamatu, nahiz eta ez dituen aldi horri dagozkion eskola guztiak jaso. Aitzitik, behin kontratua amaitzean, bezeroak ez ditu ordaindu beharko oraindik sortu ez diren zenbatekoak.

11. HORNITZAILEAK ZERBITZU-HARREMANA AMAITZEA.

11.1. Hornitzaileak kontratu hau suntsiarazi ahal izango du eta zerbitzuak emateari utzi ahal izango dio honako kasu hauetan:

i. Bezeroak ez ditu betetzen kontratuaren arabera bere gain hartutako ordainketa-betebeharrak.

ii. Ikasleak diziplinazko faltak izaten ditu edo irakaskuntzari kalte egiten dioten ekintzak burutzen ditu behin eta berriz, eta, eragindako kaltearen ordain gisa, ez du ordaindu ahal izan dituen zenbatekoak itzultzeko eskubiderik.

12. EZINBESTEKO KASUAK

12.1. Kids&Us zentro guztiei eragiten dien ezinbesteko kasuren baten ondorioz zentroa ixten bada edo zerbitzuak aurrez aurre ematea ezinezkoa bada, hornitzaileak erabat digitala den eredu bat eskainiko dio bezeroari; edukiak % 100 online izango dira edo eskola sinkronoak emango dira, ikastaroaren arabera.

12.2. Bezeroari garaiz emango zaio modalitate digitalaren berri, eta horrek ez du ekarriko baldintza partikularretan ikastaroari dagokionez itundutako kontraprestazioa aldatzea.

12.3. Baldintza orokor horien ondorioetarako, «ezinbesteko kasua» hau da: zerbitzuak ematea eragozten duen eta aurretik jakin ezin daitekeen eta saihetsezina den edozein gertakari, zirkunstantzia, gertakizun edo gertaera (kausa edozein dela ere), betiere ezin zaionean hornitzaileari egotzi eta zerbitzuak emateko ezintasunaren eta aipatutako gertakari, zirkunstantzia, gertakizun edo gertaeraren artean kausalitate-harremana badago.

13. DATUEN BABESA

13.1. «Alfa txartela» izeneko dokumentu erantsian, banan-banan adieraziko dira honako hauek: bezeroaren datu pertsonalen, ahotsaren eta irudiaren tratamenduaren arduradunen identifikazioa; bezeroak aldez aurretik ezagutzen duen arduradun jakin bati datu horiek uzte hutsagatik esparru horretan dituen eskubideak; datu horien helburua, kontserbazioa, hartzaileak eta araudiak ezarritako gainerako betekizunak.

Bezeroak informazio gehiago eskura dezake esteka honetan: https://www.kidsandus.es/eu/footer/pribatutasun-politika-eta-informazioaren-tratamendua

14. LEGE APLIKAGARRIA ETA JURISDIKZIOA

14.1. Espainiako lege komunak arautuko du kontratua.

14.2. Kontratu honen ondorioz alderdien artean sortzen den edozein gatazka edo desadostasun bezeroaren bizilekuko epaitegi eta auzitegiek ebatziko dute, alderdiei legokiekeen beste edozein foruri berariaz uko eginez.

II. ERANSKINA: MY WAY-REN BALDINTZAK

Kids&Us-ek («hornitzailea») bezeroaren eskura jartzen du Kids&Us-eko ikasleentzako hezkuntza-aplikazioa. My Way deitzen da.

My Way erabili ahal izateko eta, hortaz, zerbitzu horretaz disfrutatzeko, My Way-ren erabiltzailea izan behar zara. Horretarako, behar bezala egin behar duzu erregistratzeko prozesua eta erabiltzaile-kontu bat lortu behar duzu. Nolanahi ere, My Way erabiltzeko eta eskaintzen dizugun zerbitzuaz disfrutatzeko, zuk zuzenean edo My Way erabiliko duen adingabeko erabiltzailearen izenean eta hura ordezkatuz jardungo duen legezko ordezkari, ama, aita edo tutore gisa, onartzen duzu baldintza hauek eta hornitzaileak bere webgunean argitaratzen dituen arauak betetzea.

Hornitzaileak eskubidea du baldintza hauek aldatu, eguneratu edo berrikusteko, zuzenbidean onartzen den edozein modutan, indarrean jarri baino gutxienez hogeita hamar eguneko aurrerapenarekin. Hala eginez gero, posta elektronikoz emango dio horren berri bezeroari.

Dena den, Kids&Us-ek eskubidea du baldintza hauetan berehalako ondorioa izango duten aldaketak egiteko, honako inguruabarren bat gertatzen denean, eta geroago emango die horien berri erabiltzaileei:

• Legeak eskatuta edo segurtasun-arrazoiak tarteko beharrezkoa denean.
• My Way-n aldaketa edo doikuntza teknikoren bat egitearen ondoriozkoa denean.
• Hornitzailearen arabera segurtasuna bermatzea ahalbidetzen ez duten edo legez kontrakoak, iraingarriak, desegokiak edo diskriminatzaileak diren elementuak kentzea edo aldatzea dakarrenean aldaketak.
• Ustekabeko eta berehalako arrisku bati aurre egiteko beharrezkoa denean.
• My Way erabiliz gero, bezeroak, bere izenean eta bere burua ordezkatuz edo adingabearen izenean eta hura ordezkatuz, berariaz adierazten du baldintza hauek ezagutzen, ulertzen eta onartzen dituela

1. ERABILTZAILEAK

My Way-n erregistratzean eta sartzean erabiltzaile-izaera hartzen da. Erabiltzailea adingabea bada, zuk —haren legezko ordezkari, ama, aita edo tutorea izanik eta hura ordezkatuz— onartuko dituzu baldintza hauek. Gainera, My Way-ren erabiltzaile izan ahalko dira Kids&Us-eko irakaslea edo zuzendaria ere; aplikaziora beren irakaskuntza-jarduera egiteko sartzen dira.

2. ZERBITZUAREN EZAUGARRIAK

Kids&Us-eko ikasleentzako hezkuntza-aplikazioa da My Way, eta, ikasgelan egindako lana osatzeaz gainera, ikaskuntza pertsonalizatuko ibilbideak eskaintzen ditu, ikasle bakoitzak ikastaroaren komunikazio-helburuak lortzen dituela ziurtatzeko.

Erabiltzaileak datu zehatzak eta egiazkoak sartzeko betebeharra du; horiek erabiltzeak hirugarrenen eskubideak urratzen ez dituela adierazten du, eta, baldintza hauek urratuz gero, kalte-ordaina emateko eta hornitzailea hirugarrenen erreklamazioetatik eratorritako erantzukizun orotatik salbuesteko konpromisoa hartzen du.

My Way aplikaziora Internet bidez sar daiteke, eta aplikazioaren erabilerari buruzko datuak biltegiratu edo berreskuratzea ahalbidetzen du sarbide horrek. Erabiltzaile gisa, Interneterako sarbidea lortzeko ardura duzu, segurtasun-baldintza aplikagarri guztiak betetzen dituzten softwarea eta ekipoak erabiliz.

Baldintza hauek onartzean, erabiltzaile-datu guztien eskubideak dituzula adierazten eta bermatzen duzu, aplikazioan kargatzeko eskubidea barne.

Erabiltzaileak berariazko baimena ematen dio hornitzaileari bere erabiltzaile-datuak jaso, biltegiratu, atxiki, ostatatu, transmititu eta kopiak egiteko, baldintza hauen xede diren zerbitzuak eman diezazkion soilik.

3. ERABILTZAILEEN BETEBEHAR ETA ESKUBIDEAK

Eskubidea duzu aplikazioa aipatutako baldintzen arabera erabiltzeko. Ez dago baimenduta hirugarrenei aplikaziorako sarbidea ematea, ez eta helburu komertzialetarako edo berariaz baimendu gabeko beste edozein helburutarako erabiltzea ere. Hornitzaileak aplikazioarekin lotutako titulu, egile-eskubide eta bestelako jabetza-eskubide eta eskubide intelektual guztiak ditu. Erabiltzaileak baldintza hauetan aitortutako eskubideak baino ez ditu, eta, beraz, ez du aplikazioaren gaineko beste eskubiderik, berariazkoa edo inplizitua izan.

Konpromisoa hartzen duzu My Way legea betez eta fede onez erabiltzeko, erabiltzean hornitzailearen edo hirugarrenen eskubideak edo interesak kaltetu gabe. Zeharo debekatuta dago:

• Sistemaren erabiltzaile baten pribilegio-maila handitzen saiatzea.
• Jabetza intelektuala, jabetza industriala edo legezko beste eskubide batzuk urratzea.
• Egiazkoa ez den informazioa ematea.
• Aplikazioa behar bezalako arretarik gabe erabiltzea.
• Legearen edo moralaren aurkako jarduketak egitea.
• Enpresaren sistema erasotzea.
• Birus edo kode maltzurrak igotzea, aplikazioaren funtzionamendu egokia ezgaitu, gainkargatu edo alda dezaketen jarduerak egitea; horren adibide lirateke, esaterako, sistema automatizatuak (robotak, offline irakurgailuak, etab.). Erabiltzaileak ezingo du aplikazioa erabili bizi den herrialdeko edo sartzen den herrialdeko legeria aplikagarriak plataformara sartzea eta hura erabiltzea eragozten badio.
• Aplikazioa osorik edo partzialki kopiatzeko software edo teknologia bat zuzenean edo zeharka garatzea (Jabetza Intelektualari buruzko Legean eta aplikagarri den legedian ezarritakoaren arabera), atzeranzko ingeniaritza egitea, deskonpilatzea, desmuntatzea, erreproduzitzea, itzultzea, aldatzea, bertsionatzea, merkaturatzea, bikoiztea, eraldatzea edo pertsona edo entitateari transmititzea, nola partzialki hala osorik, ezein modutan edo bitartekoren medioz (ez mekanikoki edo magnetikoki, ez fotokopia edo beste edozein baliabideren bidez), edo aplikazioaren jabetza-abisuak, etiketak, diagrama logikoak, iturburu-kodeak, objektua eta/edo datu-eredua ezabatzea.
• Aplikazioak erabilitako prozesu telematikoetan esku hartzen duten gakoak, sistemak edo enkriptatze-algoritmoak eta beste edozein segurtasun-elementu deszifratzen ahalegintzea.
• Antzeko ekintzak gauzatzea, edo antisozialtzat jo daitezkeenak, eta zerbitzua zuzenean oztopatzen dutenak.

Kids&Us-ek eskubidea du betebehar horiek urratzen dituztenen aurka zuzenbide-alorrean dagozkion lege-ekintzak gauzatzeko.

Sarearen legez kontrako erabilerarik antzemanez gero, agintari eskudunei emango zaie horien berri, indarreko legeria betez.

4. PASAHITZEN ERABILERA

My Way-ra sartzeko, erabiltzaile-kode bat eta pasahitz izendun eta besterenezin bat —posta elektronikoz emango dira— sartuz erregistratu behar du erabiltzaileak. Erabiltzailea da bere pasahitza behar ez bezala erabiltzeak ekar ditzakeen ondorioen erantzule bakarra.

My Way-ren sarbidea eta erabilera erabiltzailearentzako baino ez dira; beraz, erregistratzen zarenean, zure izenean edo adingabearen izenean eta hura ordezkatuz adierazten duzu baldintza horiek betetzen dituzula.

Erabiltzaile-kodea eta pasahitza ez dira aktibo egongo (My Way-rako sarbidea, hala, ezgaituta egonik) erabiltzaileak baldintza hauek onartu arte.

5. ALTA-PROZEDURAREN DESKRIBAPENA

My Way-ra sarbidea duten Kids&Us hezkuntza-ikastaroak kontratatzeak aukera ematen dio erabiltzaileari aplikazioa baldintza hauen arabera erabiltzeko.

6. ERABILTZAILEARI LAGUNTZEKO ZERBITZUA

Aplikazioa erabiltzean gerta daitekeen edozein gertakari teknikotarako, erabiltzaileak honako bide hauek ditu harremanetan jartzeko:

• Herrialde hauetan baldin bazaude, dagokion lurraldeko lan-ordutegian artatuko zaituzte, telefono-zenbaki hauetara deituta: +34 931 22 04 40 (Espainia), +39 800 69 43 98 (Italia), +33 970 01 91 86 (Frantzia), +32 800 26 739 (Belgika) eta +52 554 163 6141 (Mexiko).
• My Kids-en propio jarritako formularioa betetzea. 
• Mezu elektroniko bat idaztea [email protected] helbidera.

7. JABETZA INTELEKTUALA ETA INDUSTRIALA

Hornitzailea aplikazio honen eta bertako eduki guztien (hala nola irudiak, softwarea eta testuak; markak edo logotipoak, kolore-konbinazioak, egitura eta diseinua, erabilitako materialen hautaketa, orriaren funtzionamendu, sarrera eta erabilerarako beharrezko ordenagailu-programak, etab.) jabetza intelektual eta industrialaren eskubide guztien titularra da. Espainiako ordenamendu juridikoak jabetza intelektual gisa babestutako obratzat hartzen da My Way, eta eremu horretan Espainiako Estatuak eta Europar Batasunak ezarritako araudia eta gai horri buruzko nazioarteko itunak —Espainiak sinatutakoak— aplika dakizkioke. Eskubide guztiak erreserbatuta. Jabetza Intelektualari buruzko Legearen 8. artikuluan eta 32.1 artikuluaren bigarren paragrafoan xedatutakoari jarraikiz, erabat debekatuta dago aplikazio honetako edukiak erabat edo partzialki erreproduzitzea eta banatzea, baita horien jendaurreko komunikazioa egitea ere, xede komertzialekin, edozein euskarritan eta edozein baliabide teknikoren bitartez, eskubideen titularren baimenik gabe. Erabiltzaileak bere gain hartzen du eskubideen titularren titulartasuneko jabetza intelektual eta industrialeko eskubideak errespetatzeko konpromisoa. Aplikazioko elementuak bistaratu ahalko ditu, baita inprimatu, kopiatu eta bere ordenagailuko disko gogorrean edo beste euskarri fisikoren batean gorde ere, baldin eta erabilera pertsonal eta pribaturako baino ez bada. Erabiltzaileak ezingo du ezabatu, aldatu, saihestu edo manipulatu aplikazioan instalaturiko ezein babesgailu edo segurtasun-sistema.

Baldintza hauetatik inolaz ere ezingo da —ez inplizituki ez esplizituki— ondorioztatu aplikazioari eta/edo teknologiari dagozkion jabetza industrialeko edo intelektualeko eskubideak lagatzen edo eskualdatzen zaizkionik erabiltzaileari, eta, baldintza hauen arabera, eskubide horien titulartasuna zorrotz errespetatu beharko da, titularrei idatziz jakinarazteaz gainera eskubide horien edozein arau-hauste, halakoen berri izanez gero.

8. ERANTZUKIZUNETIK SALBUESTEA

Aplikazioak euskarri gisa balio dio profesionalari eta, beraz, aplikazioa erabiltzeak erabiltzailea ez du salbuesten sartutako datuak eta aplikazioak erabilitako datuak zuzenak ote diren egiaztatzetik. Erabiltzailea da, hain zuzen, datuak eguneratu gabe egotearen erantzule bakarra eta ez, horrenbestez, hornitzailea.

Hornitzaileak, tratamenduaren arduraduna den aldetik, segurtasun-agiri bat du eta Datuak Babesteko 2016/679 (EB) Erregelamenduan eta Datu Pertsonalak Babesteko eta Eskubide Digitalak Bermatzeko 3/2018 Lege Organikoan aurreikusitako baldintzak betetzen ditu. Horrez gain, eskura dituen baliabide tekniko guztiak ezarri ditu datuen galera, erabilera txarra, aldaketa, baimenik gabeko sarbidea eta lapurreta saihesteko, betiere Interneteko segurtasun-neurriak menderaezinak ez direla jakinarazi behar dela alde batera utzi gabe. Erabiltzailea da bere gailuetan bere informaziorako sarbidean segurtasuna bermatzeko segurtasun-sistema edo -programa egokiak (adibidez, suebakiak, antibirusak edo beste batzuk) izatearen arduradun bakarra.

Horrelako zerbitzu bat emateko erantzukizunetik kanpoko faktore asko existitzen direnez, ez da bermatzen —ez inplizituki, ez esplizituki— zerbitzua erabat eskuragarri egongo denik.

Tratamenduaren arduradunak ez du bere gain hartzen telefono-interferentzia edo -matxuretatik, sistema elektronikoan deskonexioetatik, birus informatikoen presentziatik, programa maltzurretatik edo kontroletik kanpoko beste edozein faktoretatik sortutako kalte-galeren gaineko erantzukizunik.

Tratamenduaren arduradunak erabiltzailearen eskura jarriko du aplikazioa, inolako berme espresu edo inpliziturik gabe, barne hartuta, modu adierazkorrean baina ez mugatzailean, merkaturagarritasunaren, patentagarritasunaren edo helburu jakin batera egokitzearen bermea, bai eta akats edo okerrik ez egotearen bermea ere, ez eta sistema jakin batean integratzeko gaitasunari, tituluari edo hirugarrenen jabetza intelektual eta/edo industrialeko beste ezein patente edo eskubide ez urratzeari dagokionez ere.

Tratamenduaren arduraduna ez da aplikazioak edo aplikazioaren erabilerak eragindako akatsen erantzule, nahiz eta zerbitzuan etena eragin, ez eta atzerapena dagoenean edo funtzionamenduari eragiten dionean. Halaber, ez da aplikazioaren erabilerarekin, hura erabiltzeko ezintasunarekin edo haren funtzionamenduarekin zuzenean edo zeharka lotutako efektu edo ondorioen erantzule, ezta aplikazioaren erabilera okerragatik eratorritako ekintzen edo hirugarrenen erreklamazioen erantzule ere.

Tratamenduaren arduradunak testu honen ondoriozko erantzukizunen bat badu, alderdiek adostu dute erantzukizun hori erabiltzaileak ordaindutakoa baino ez dela izango.

Alderdietako batek ere ez dio beste alderdiari erantzungo, inola ere ez, zeharkako kalteengatik eta lortu gabeko irabaziengatik.

9. ADIERAZPENAK ETA BERMEAK

Zure izenean edo erabiltzaile adingabearen izenean eta hura ordezkatuz adierazten duzu eta bermatzen diozu hornitzaileari:

•  Eskubide eta ahalmen osoak dituzula, zure estatutu- eta lege-araubidearen arabera, baldintza hauen arabera zure gain hartutako konpromiso, jarduketa eta betebehar guztiak betetzeko eta betearazteko.
• Adingabeko erabiltzailearen ama, aita edo legezko tutorea bazara, eskubide eta ahalmen osoak dituzula, zure estatutu- eta lege-araubidearen arabera, baldintza hauen arabera zure gain hartutako konpromiso, jarduketa eta betebehar guztiak betetzeko eta betearazteko.
• Hornitzaileari inolako erantzukizunik ez diozula egotziko erreklamazio, kostu, kalte eta galerengatik, baldintza hauetan adierazitako betebehar, adierazpen edo bermeak ez betetzeagatik, faltsutzeagatik edo horien zehaztugabetasunagatik.
• Baldintzak onartzean, adierazten eta bermatzen duzu erabiltzailearen datu guztien eskubideak dituzula, datuok My Way-n kargatzeko eskubidea barne.
• Hornitzaileari kalte-ordaina eman beharko diozula edozein erreklamazio dela-eta, baldintza hauetan adierazitako betebehar, adierazpen edo bermeak ez betetzeagatik, faltsutzeagatik edo horien zehaztugabetasunagatik jarri bada, bai eta erabiltzaileek edo edozein hirugarrenek Kids&Us-ek emandako zerbitzuen ondorioz, zuzenean edo zeharka, egindako edozein erreklamazio dela-eta ere.

10. INDARREAN JARTZEA ETA IRAUPENA

Baldintza hauek erabiltzaileak jasotzean edo My Way-n argitaratzean jarriko dira indarrean. Hornitzaileak aldizka eguneratu ditzake. Hornitzaileak aldaketen berri emango dio erabiltzaileari, aldaketok indarrean jarri aurretik, posta elektroniko bidez. Dokumentu hau aldian behin berrikustea gomendatzen dugu, aldaketa ororen berri izan dezazun.

11. DATUEN BABESA

My Way erabiltzean emandako datu pertsonal guztiak hornitzailearen pribatutasun-politikaren arabera tratatuko dira. Esteka honetan eskura ditzakezu: https://www.kidsandus.es/eu/footer/pribatutasun-politika-eta-informazioaren-tratamendua

12. LEGE APLIKAGARRIA ETA JURISDIKZIOA

Baldintza hauek Espainiako lege komunak arautuko ditu.

Sortzen den edozein gatazka edo desadostasun bezeroaren bizilekuko epaitegi eta auzitegiek ebatziko dute, alderdiei legokiekeen beste edozein foruri berariaz uko eginez.